Loðnutalning í hafinu. - Dæmalausir útreikningar Hafró

Sem kunnugt er verður leyfður loðnuafli í ár með minnsta móti , eða 57 þúsund tonn, þar af koma 11 þús. tonn í hlut íslendinga. Hafró mældi loðnustofninn, gaf út kvóta sem ráðherra samþykkti athugasemdalaust sama sólarhringinn.

Mældu loðnustofninn, það er nú það. Lítum á heimasíðu Hafró þar sem segir frá þessu:

"Gerðar voru 2 mælingar á veiðistofninum. Sú fyrri fór fram dagana 12. – 15. janúar og fannst loðna frá sunnanverðum Vestfjörðum norður um og austur að Kolbeinseyjarhrygg (mynd 1). Þar fyrir austan varð ekki vart við fullorðna loðnu. Þar sem veður var slæmt þegar mælingunni lauk biðu skipin á Siglufirði þar til veður batnaði. Síðari yfirferðin fór fram dagana 17. – 20. janúar á svæðinu frá Kolbeinseyjarhrygg og vestur um (mynd 2). Veður var viðunandi en ís hafði færst yfir hluta mælingasvæðisins í seinni yfirferðinni.

Um 398 þúsund tonn af kynþroska loðnu mældust í fyrri yfirferðinni og mæliskekkja (CV) var metin 0.2. Í síðari yfirferðinni mældust um 493 þúsund tonn og mæliskekkjan metin 0.23. Meðaltal þessara mælinga, 446 þúsund tonn, er mat á stærð veiðistofns."

Þetta er vægast sagt skrítið, ef ekki met í vitleysu. Fyrst eru mæld 398 þús. tonn, í seinni túrnum mælist meira eða 493 þús. tonn. Svo er tekið meðaltal af báðum tölunum!

Hvað ef hefðu mælst 7 þús. tonn í fyrstu mælingu? Hefði niðurstaðan þá orðið meðaltalið 250 þús. tonn? Takið einnig eftir því að þarna er talað um slæmt veður og að ís sé yfir hluta svæðisins.

Þetta er sambærilegt við að ég teldi 10 skarfa á Elliðavatni í þoku, færi svo daginn eftir í sólskini og teldi 30 og gæfi út niðurstöðuna:

Það eru 20 skarfar á Elliðavatni núna.

Var verið að gefa út aflaheimildir á vísindalegum grunni?

Athugasemdir

[Halldór Egill Guðnason, 27.1.2017 kl. 15:24]

Þegar sérfræðingar Hafró standa með annan fótinn í sjóðandi vatni og hinn í ísvatni, standa þeir semsagt í volgu vatni að meðaltali. Þetta eru í meiralagi undarlegir útreikningar. Enn verra er þekkingar og að því er virðist algert andleysi stjórnmálamanna, að kaupa þessa dellu, ár eftir ár.

 Góðar stundir, með kveðju að sunnan.

[Jón Þórhallsson, 28.1.2017 kl. 10:03]

Sæll Jón!

Hvernig myndir þú áætla stofn-stærð loðnu-stofnsins?

Það er alltaf dýrmætara að sýna leiðarljósið

heldur en að flagga öllu því sem að maður vil ekki.

[Jón Kristjánsson, 28.1.2017 kl. 11:21]

Þarf að áætla stærð loðnustofnsins? Má ekki gera þetta eins og áður fyrr, bíða eftir að loðnan gangi og hefja svo veiðar? Nei það má víst ekki lengur, krafan er að stjórna á vísindalegan hátt, þá þarf að "mæla" stofninn og fá samþykki vísindasamfélagsins og græninga um að allt sé "undir kontról". Svo er allt kvótabundið, menn vilja vita kvótann sinn svo þeir geti hagað veiðum þannig að þeir fái sem mest út úr honum. Við erum orðnir þrælar þessa vísindasamfélags sem stöðugt sækist eftir meiri vinnu handa sér, sbr. "það þarf að auka (loðnu)rannsóknir"....

[Jón Þórhallsson, 28.1.2017 kl. 12:11]

Gefum okkur að það væri ekkert yfirvald sem að mældi stofnstærðir og að allir mættu veiða eins mikið og að þeir vildu.

Finndist þér t.d. í lagi að ég myndi veiða 500 þúsund tonn af loðnu ef að ég ætti stóran skipaflota og gæti gert það?

[Jón Kristjánsson, 28.1.2017 kl. 19:34]

Já, í fullkomnu lagi. Það er ekki hægt að veiða hrygningastofninn þannig niður að hann gefi ekki nóg af sér. Og mundu, að öll loðnan deyr að lokinni hrygningu og úldnar á botninum.

Því miður er búið að innprenta okkur það að við getum eytt fiskstofnum með veiðum. Færri vita að rannsóknir, reyndar 100 ára gamlar, sýndu eð þegar hætti að veiðast, var helmingur stofnsins eftir. Fiskurinn lærði hvernig hann ætti að forðast veiðarfærin. En slíkar niðurstöður passa ekki inn í hræðsluáróðurinn um að nauðsynlegt sé að stjórna veiðum.