Á að banna álaveiðar á Íslandi?

Verið er að undurbúa reglugerð um bann við álaveiðum. Ég sendi eftirfarandi umsögn um reglugerðina í dag:

Ég undirritaður legg til að þessi reglugerð verði dregin til baka.

Órökstutt er að áll sé í hættu vegna ofveiði almennt og alls ekki hér á landi. Tilgátan um að minnkandi hrygningarstofn sé orsök minnkandi reks álalirfa til Evuópu er hrein ágiskun. Það þarf ekki miklar breytingar á hafstraumum eða almennu náttúrufari til að það komi fram í minnkuðu reki álalirfa.

Ég vann á Veiðimálastofnun í 17 ár og kom m.a. að álaveiðum og verkefnum þar tengdum, dreifði álagildrum til bænda og hvatti þá til að nýta auðlindana, yfirleitt við litlar undirtektir viðkomandi. Ég álít að álaveiði á Íslandi sé afar lítil og efast um að aflinn nái 10 tonnum. Bann við álaveiðum gerir þeim örfáu sem nýta hann til matar erfitt fyrir og býr til lögbrjóta.

Á Íslandi er miklu meira um ál en menn halda, hann gerir lítið vart við sig. Hann er í öllum vötnum og síkjum sem hafa samband við sjó frá Hornafirði til Vestfjarða. Hann festist ekki í netum en oft má sjá merki um hann því hann skilur eftir sig slímhringi í möskvunum þegar hann treður sér í gegn. Bann við álaveiðum er hreinlega hlægilegt.

 Þessi beiðni um álaveiðbann er sett fram að kröfu ICES enda veit Hafró lítið um ál og álaveiðar á Íslandi að eigin sögn:
"Eins og áður sagði eru ekki fyrirliggjandi tölur um álaveiði hér á landi. Ekki eru neinar rannsóknir á nýliðun eða vöktun í gangi hér á landi og því ekki til sértækt mat á veiðiþoli." 
Samt segja þeir: "Álastofninn er í hættu og þolir illa veiðar. Meðan svo er er það ráðgjöf Hafrannsóknastofnunar að bann verði sett á allar álaveiðar hér á landi. Jafnframt að ef áll veiðist í silungs eða laxveiði verði skylt að sleppa honum."

Ekki er samt meiri alvara í þessu en að lagt er til að heimilt verði að sækja um undanþágu til veiða ál til eigin neyslu, m.a. til að afla uppplýsinga um afla og sókn, gögn sem má afla með smávegis símavinnu og vettvangsferðum.

Þrátt fyrir að ICES hafi lagt til bann við öllum álaveiðum frá árinu 2000 er uppgefinn ársafli 2-3 þús. tonn frá árinu 2009. Það eru því ekki allir sem hlusta á ráðgjöfina.
Væntanleg reglugerð er algerlega óþörf og bakar meiri vandræði en gagn. Hana ber að draga til baka.

Jón Kristjánsson

-----------

Hér er athyglisverð grein um álarannsóknir og vísað er til merkinga á ál til þess að kortleggja ferðir hans á leiðinni til hrygningarstöðvanna í Saragassohafi. Athygli vekur að mikið af ál er bráð hvala á leiðinni þar sem þeir finna álinn með asdikkinu á miklu dýpi. 

Kortið sýnir hvar merktir álar endurheimtast og hver örlög þeirra urðu. Merkin eru fyrirfram forrituð um hvenær þau eiga að losna úr fiskinum og senda gögnin í gervihnött. Hitastig er skráð og ef í ljós kemur að það hafi snarlega hækkað í 37 gráður er dregin sú ályktun að þau hafi verið étin af hval. (Smellið á mynd til að stækka)

 

Athugasemdir

[Jón Þórhallsson, 27.2.2019 kl. 20:19]

Er ekki ógjörningur að fylgja svona bönnum eftir?

Ef að einhverjir bændur á afskekktum stöðum hafa aðgang að svæðum þar sem að álar fara um er þá ekki ógjörningur fyrir einhvera eftirlits-aðila að fara að eltast við slíkt bann?

[Jón Kristjánsson, 27.2.2019 kl. 20:38]

Að sjálfsögðu, það er verið að búa til glæpamenn, eins og í kvótakerfinu.

[Valdimar Samúelsson, 27.2.2019 kl. 20:44]

Þetta er það sem ráðuneytin gera ásamt stofnunum eru þeir kannski að vernda einhvað annað s.s. lax ef hann kæmi í gildrurnar. Við fengum stundum las í selanetin við Hópið í gamladaga. Hann náði að fara með kjaftinn í möskva ot rullaði sig fastan 

[Jón Þórhallsson, 27.2.2019 kl. 21:19]

Landeigendur þar sem að álar fara um

þurfa að finna það hjá sjálfim sér hvað þeir vilja gera.

[Jóhann Elíasson, 27.2.2019 kl. 21:48]

Ekki getur verið um mikla ofveiði að ræða því állinn er kominn í flest veiðivötn hérna á suður og vesturlandi.  Ég var í sveit í Borgarfirði á árunum 1966 - 1973 og á þeim árum var mjög sjaldgæft að rekast nokkurs staðar á ál en síðustu ár hefur það verið hending ef maður fær EKKI ál og þá sérstaklega í vötnunum á Mýrunum.  Ég veit ekki hver útbreiðslan á landsvísu er en ég veit af honum á sunnanverðum austfjörðum og þá eru bara Vestfirðir, Norðurland og Norðausturland eftir.  En það kæmi mér ekki á óvart að hann væri kominn um allt land.  Állinn er alveg ótrúlega lífseigur og það er alveg ótrúlegt að fylgjast með hvernig hann skríður á milli vatna og vatnasvæða.

[Samtök um rannsóknir á ESB ..., 27.2.2019 kl. 23:33]

Þessi tillaga Hafró um álaveiðbann er hreint og beint hlægileg, en því miður ekki bara hlægileg. Þarna er verið að beina spjótum að atvinnugrein að ósekju, mörgum til tjóns, eins og alveg er ljóst af tilvitnunum Jóns Kristjánssonar í ummæli Hafrómanna, sem lítið vita í sinn haus um ástand álamála hér á landi og keyra þó á sína freku ofstjórnartillögu: hreint bann út í loftið!

Oft höfum við haft lítið álit á Hafró, en það liggur við að þetta slái öll met. Hvað ætli starfi þar margir ofborgaðir í því hlutverki að standa íslenzkum fiskveiðum fyrir þrifum?

[Jón Valur Jensson, 27.2.2019 kl. 23:34]

Úpps, var ekki útskráður af Fullveldisvaktinni, en innleggið er bara í mínu eigin nafni.

[Björn S. Stefánsson (IP-tala skráð) 28.2.2019 kl. 09:51]

Skilmerkilegt

[Jón Þórhallsson, 1.3.2019 kl. 10:57]

Er þetta ekki bara eins og með ísbjarnarveiðar og álaveiðar hér á landi.

=Skiptir ekki miklu máli þar sem að þessar tegundir

fjölga sér ekki hér við landið og þó að þessar tegundir flækist hingað

þá er enginn stór skaði þó að þær séu veiddar hér við land.