Er ráðgjöf um humarveiðar kolröng? Gæti verið.

Fróðlegt er að lesa ráðgjöf Hafró um humarveiðar á komandi fiskveiðiári. Aflinn hefur mest orðið um 2500 tonn, síðast árið 2010. Í fyrra var ráðlagt að veiða 1300 tonn en lækkað í 1150 tonn nú.

Í skýrslunni, sem var að koma út segir: "Veiðidánartala hefur verið metin lág undanfarin ár og er undir skilgreindum gátmörkum. Nýliðun hefur minnkað síðan 2005 og hefur aldrei verið metin eins lítil og nú. Viðmiðunarstofn hefur minnkað hratt undanfarin ár og hefur ekki verið lægri frá 1980. Hlutfall stórhumars er enn hátt en hefur minnkað frá 2009."

Hér má sjá hvernig nýliðun hefur hrunið frá árinu 2008 en um það leiti var sett á 20% aflaregla í þorski og hrygningarstofninn stækkaði, vegna innkomu makríls og síldar og beitarálag á humar og fleiri fæðudýr jókst.

Hvað er að gerast?

Alþekkt er frá Skotlandi og Írlandi að humar étur undan sér. Tilraunir með að friða svæði í þeim tilgangi að stækka stofninn hafa reynst afar illa. Þegar svæði voru opnuð aftur eftir nokkurra ára friðun gripu menn í tómt, einungis veiddust nokkrir stórir humrar. Þar hafa menn lært að miðin þurfa stöðuga áníðslu til að hindra sjálfát en þessi mikla sókn leiðir auðvitað til þess að humarinn er almennt smærri en menn velja að sjálfsögðu marga smærri en örfáa stærri. Við bætist að mikið er af stórþorski, sem þekktur er fyrir að háma í sig humarinn. Humarinn er þannig sjálfur að éta upp ungviðið sitt og þorskurinn humarinn.

Ráðgjöfin

Ráðgjöfin er svo að veiða lítið af þorski til að hafa stóran fóðurfrekan hrygningarstofn og draga úr veiðum á humri. Já það verður víst að fara varlega segja þeir Hafróarnir.

Hér má sjá hvernig stórhumars jókst, væntanlega vegna samdráttar í leyfðum afla. Fjölgun stórra humra þýðir meira beitarálag á smáhumar, sjálfát. Hvort tveggja, aukning stórra þorska og stórra humra, minnkar nýliðun.

Mörg dæmi eru um að sóknarbreytingar hafi leitt til minnkandi afla þrátt fyrir að kvótar hefðu verið nægir. Veiðin á Fladen banka, SA af Shetlandseyjum í Norðursjó, hefur dregist saman úr 13.000 tonnum árið 2010 í 2.000 tonn 2015. Kvótinn 2015 var um 11.000 tonn en einungis 2.000 tonn voru veidd. Breytingar urðu á sókninni árið 2010 þegar möskvi var stækkaður úr 80-85 mm í meira en 100 mm til að vernda smáhumar. Auk þess var trollum breytt til þess að forðast meðveiði af þorski. Það þýðir að hætt var að veiða þorsk, sem var að andskotast í humrinum.

Ekki hef ég nægar upplýsingar til að tengja veiðimynstrið við aflaminnkunina en þetta virðist á þekktum nótum, sóknarminnkun leiðir til sjálfáts, aukinnar samkeppni og aflaminnkunar.

En það þarf að spyrja þeirrar spurningar hvort sóknarminnkun leiði til stofnaukningar. Við vitum að samdráttur leiðir til aflaminnkunar en hann kann einnig að hafa mun alvarlegri afleiðingar.

Ætla þessir ráðgefendur aldrei að skilja að sóknarminnkun gefur ekki aukinn afla, hvorki í bráð né lengd. Veiðarnar eru ekki það sem ákveður stærð og viðgang fiskstofna. Samkeppni og fæðuframboð ráða þar mun meiru. Sóknarminnkun þýðir einungis minni tekjur.

En ráðgjafarnir bregðast, enda er munurinn á manninum og hundinum sá að hundurinn lærir af reynslunni en maðurinn ekki.

Athugasemdir

[Jón Þórhallsson, 19.6.2017 kl. 09:33]

Vantar ekki inn í þessar upplýsingar HVAR/Á HVAÐA HAFSVÆÐI  

þessi rannsókn fór fram um nýliðun á humar?

[Jón Kristjánsson, 19.6.2017 kl. 14:05]

Þetta er á humarslóðinni við Ísland. Þar er gerð "stofnmæling" á hverju ári.

[Jón Þórhallsson, 19.6.2017 kl. 15:03]

Þarf nokkuð annað en að stofninn (þar sem að mælingin er von að eiga sér stað)

flytji sig um kannski einhverja 50km. í einhverja áttina og þá er mælingin orðin að engu og gefur ekki rétta niðurstöðu?

[Halldór Egill Guðnason, 19.6.2017 kl. 16:05]

 Hreyfanleiki og frávik passa illa saman við exelútreikninga og ekki tekin með inn í myndina hjá Hafró, svona til að svara Jóni Þórhalls einhverju.

 Það er Íslenskri þjóð mikið lán að aðferðafræði "sérfræðiþekkingar" Hafrannsóknarstofnunar er ekki látnir stjórna Íslenskum sauðfjárbúskap, með stórundarlegum reiknilíkönum sínum. Reiknilíkönum sem leiðrétt eru annað veifið, en helst ekki fyrr en einhverjum árum eftir að vitlaust er reiknað og þá helst í kyrrþey og með pukri og útúrsnúningum.

 Samkvæmt "teóríu" Hafró á að skjóta allar rollurnar á haustin, en setja lömbin á hús yfir veturinn. Stranglega bannað að fella lömbin og hver sá sem uppvís verður að því rekinn burt. Jafnvel gert að snúa sér að skíthoppararækt, ef lætur ekki segjast. Eftirlitsmenn "Lambastofu"myndu sjá um það.

 Ekki einasta yrði heyþurrð um miðjan vetur, af þessum sökum, heldur hyrfi beitarhaginn með ljóshraða yfir sumartímann einnig, sökum of margra munna að metta, miðað við fæðuframboð. Það gilda nefnilega sömu lögmál um þetta, hvort heldur er undir eða yfir sjávarborði.

 Ár eftir ár og áratugum saman vellur dellan frá þessari stofnun. Þjóðinni til hundruða milljarða taps kyngja pólitískir amlóðar froðunni og telja sér trú um að á Íslandi sé besta fiskveiðistjórnunarkerfi í heimi. 

 Annars allt gott að frétta héðan úr suðrinu Jón, nema djöfuls ótíð búin að vera. 

Góðar stundir, með bestu kveðjum að sunnan.

[Halldór Egill Guðnason, 19.6.2017 kl. 16:20]

Ásgeir heitinn Jakobsson, sá mikli snillingur, komst mjög vel að orði eitt sinn, er hann sagði eitthvað á þá leið að fiskifræðingar næðu aldrei að byggja upp fiskistofna "miðað við alla þá þekkingu sem þá vantaði".

Þetta hefur og mun sennilega ávallt eiga við um fiskifræðin, sem og mörg önnur fræði.

 Góðar stundir og það enn að sunnan.

[Jón Kristjánsson, 19.6.2017 kl. 22:41]

Sæll Dóri. Gaman að heyra af og til úr suðrinu. Já vitleysan heldur áfram en þegar þú talar um féð minnist ég þess að Thor Jensen keypti eitt sinn mjög mikið af fé og hugðist flytja til Skotlands. Meðan beðið var eftir skipi kom hann því fyrir í Leirársveit. Svo fór að skipið villtist eða hlekktist á svo því seinkaði um tvo mánuði. Þá var féð komið að niðurlotum úr hor, haginn gróflega ofbeittur, svo lítið varð úr sölunni. Þetta þekkja þeir ekki Hafróarnir.

Þá hef ég orðið var við að menn hér, lærðir og leikir, vita ekkert um hvernig humarveiðar eru stundaðar frá Skotlandi og Írlandi. "Veiða þeir ekki bara í gildrur?" sagði einn úr sjávarútveginum við mig. En humarinn er þar aðallega veiddur í troll og mikið er um Twin rigs, tveggja trolla skip.

Ég kynntist þessu þegar ég var þarna og allir voru á því að miðin þyrftu mikla áníðslu, væru svæðin látin í friði hyrfi humarinn. En þeirra fræðingar eru líka blindingar og vilja friða. Spaugilegt fanns þeim að fræðingarnir unnu einungis dagvinnu, en þá lét flotinn reka því humarinn veiddist aðeins á nóttunni. Dálagleg stofnmæling það, en allt er það eins liðið hans Sveins.

Góðar kveðjur í suðrið