Erfitt að spá um laxveiðina? - Það er nú það

Veftímaritið Flugufréttir hafði samband við mig í febrúar sl. og bað um laxaspá fyrir sumarið. Af reynslu veit ég að þá verður að stíga varlega til jarðar og ekki taka of djúpt í árinni því það getur haft áhrif á veiðileifasölu í báðar áttir. En þegar maður fæst við laxarannsóknir verður ekki hjá því komist að hafa skoðun og gefa álit.

Þegar séð var í hvert stefndi í þótti Flugufréttum ástæða til að rifja upp spár fyrir sumarið og 4. júlí birtu þeir þetta: 

Smálaxagöngurnar sem flestir vonuðu að myndu skila sér með Jónsmessustraumum um síðustu helgi, stærsta straumi sumarsins, komu ekki. Ástandið virðist, samkvæmt þessum tölum vera einna verst í ánum á Vesturlandi, en þær gefa um það bil 40% af laxveiðinni hérlendis.

Um miðjan febrúar báðum við fiskifræðinga að spá um laxveiðina í ár. Þeir voru ekki sammála. Jón Kristjánsson sagði: "Ef ég man rétt, þá var maí á síðasta ári mjög kaldur og sumarið eitt það kaldasta í mörg ár. Það lofar aldrei góðu. Vorið var líka úrkomulítið en þá ganga seiðin til sjávar í glæru vatni en það eykur líkurnar á því að þau verði drepin (étin af flugvargi, innskot JK). Þannig að möguleikarnir á stórgöngum smálaxa eru ekki miklir á komandi sumri," sagði Jón í febrúar.

Sigurður Már Einarsson á Veiðimálastofnun var hins vegar bjartsýnn. Hann sagði: "Seiðavísitalan gefur sterklega til kynna að laxveiðin verði góð á sumri komanda," segir hann og undirstrikar að hann sé eingöngu að tala um laxveiðiárnar á Vesturlandi, þær sem hann hefur fylgst með og rannsakað síðustu ár.. "Í ánum eru til mælingar á seiðavísitölunni mörg ár aftur í tímann, í sumum tilvikum allt aftur til ársins 1985. Þetta eru ansi langar gagnaraðir sem eru mjög verðmætar heimildir. Ég hef verið að skoða og tengja seiðamagnið í ánum við það sem skilar sér til baka í árnar. Þetta er m.a. hægt með því að lesa upplýsingar úr hreistri laxins ... en eins og allir vita, þá geta ófyrirsjáanlegar aðstæður gripið inn í, veðurfar og breytt skilyrði í hafinu. En þetta lítur vel út og ég er bjartsýnn," sagði hann í febrúar.

Það er víst ekki miklu við þetta að bæta, nema að árétta að afkoma seiðanna að vori í ánum, skilyrðin sem þau mæta þegar þau koma í sjó og sjávarskilyrði almennt virðast ráða meiru en fjöldi seiða í ánum haustið áður en þau ganga út.

Dræm laxveiði kemur mönnum í opna skjöldu

Athugasemdir

[Þórir Kjartansson, 19.7.2014 kl. 13:44]

Áttu ekki allar ár að fyllast af laxi eftir að menn fóru að ástunda ,,veiða/sleppa" ruglið?

[Jón Kristjánsson, 19.7.2014 kl. 15:47]

Lítið rætt um það núna Þórir. Kannski reyna  menn til þrautar og fara að sleppa öllu?

[Svanur Guðmundsson, 20.7.2014 kl. 14:16]

Það hefur alltaf vantað að skoða betur hvað nær að sleppa úr ánum og í sjó. Arðránið sem verður við árósana er mikið en hvað mikið það veit enginn. Þegar Silfurlax var með hafbeit í Hraunsfirði reyndu þeir að meta þetta og komust að því að stórar torfur af þorski lá utarlega í firðinum og seiðin syntu upp í hann. Aldrei hef ég skilið að veiðiréttarhafar skuli ekki reyna að fæla fugl sem situr við árósa og gúffar í sig seiðum.

[Jón Kristjánsson, 20.7.2014 kl. 18:14]

Svanur. Takk fyrir upplýsingarnar, ég hef svipaðar fréttir frá Noregi þar sem þorskur liggur utan við árnar á vorin. Ég sótti þrisvar um styrk í Vísindasjóð til að athuga þetta en fékk alltaf neitun. Þeir höfðu engin rök, en einkaaðilar fá yfirleitt ekki styrki, ríkisstofnarnirnar hirða allt. Allt er gert til að halda okkur frá og ég er löngu hættur að eyða vinnu í styrkumsóknir.