Þorskurinn á niðurleið. Hvað gera 20% aflareglumennirnir nú?

Nú er að koma fram það sem ég hef bent á sl. 2 ár, að þorskstofninn myndi fara niður.
Þó allt sé logandi af stórþorski allt í kring um landið virðist svo að niðursveiflan sem mælingin gefur til kynna liggi í vöntun á smáfiski. Þrátt fyrir að hrygningarstofninn sé nú sá stærsti í áratugi hefur verið nýliðunarbrestur undanfarin ár. Stór hrygningarstofn skilar ekki þeim árangri sem Hafró hefur stefnt að enda er það öfugt við náttúrulögmálin. Þegar stofn verður of stór grípur náttúran til sinna ráða. Helmingi minna er nú tekið úr stofninum en þegar við vorum að veiða 450 þús. tonn, eða 20% nú í stað 35% áður. Það eru ansi margir milljarðatugir, sem tapast árlega með því að veiða ekki meira - með þessum líka fína árangri sem nú liggur fyrir.

En skýringar Hafró á lækkun vísitölunnar vantar ekki, ef einhver skilur þá þessa samsuðu:

"Minna fékkst af mörgum tegundum en undanfarin tvö ár, hugsanlega vegna áhrifa annarra þátta en stofnstærðar. Árin 2005-2013 hækkaði vísitala þorsks í vorralli mun meira en stærð viðmiðunarstofns í stofnmati. Að sama skapi eru líkur á að vísitalan í ár sem er nokkru lægri en í fyrra, vegi aðeins að hluta til lækkunar áætlaðrar stærðar viðmiðunarstofns þorsks".

2013 árgangurinn lítill

Athugasemdir

[Ásthildur Cesil Þórðardóttir, 10.4.2014 kl. 12:21]

Þarf ekki að fara að skipta um "sérfræðingana" á hafrannsóknarstofnun. Þeir ættu að fá þig með í liðið allavega Jón, þú átt þinn þátt í að bjarga Færeyingjum frá gjaldþroti.

[Jón Kristjánsson, 10.4.2014 kl. 18:25]

Jú Ásthildur, en ekki eru líkur á því, ráðherra var í dag að lofa að beita sér fyrir auknum fjárveitingum til þeirra. Reyndar, ég stöðvaði undanlát Færeyskra sjávarútvegsráðherra við þeirra Hafró. Fjöldi fiskidaga hefur haldið sér að mestu síðan þá. Hér heima heldur trukkurinn áfram að spóla í drullunni og vill ekki þiggja leiðbeiningar um betri leið yfir dýið.

[Ásthildur Cesil Þórðardóttir, 10.4.2014 kl. 19:54]

Já einmitt, það færi betur að þeir hlustuðu á mann eins of þig, sem hefur sannað að VEIT hvað er í gangi.

[Þórir Kjartansson, 10.4.2014 kl. 20:51]

Eitt af því örfáa sem núverandi og fyrrverandi sjávarútvegsráðherrar eru sammála um - er að efla þurfi Hafró.   Furðulegt, þó ekki sé meira sagt.

[Ásthildur Cesil Þórðardóttir, 10.4.2014 kl. 23:44]

Já það er alveg ótrúlegt miðað við árangur af ráðgjöfinni undanfarin mörg ár.