Sandsílið, lundinn og týnda kynslóðin - Bottom-up?

Titillinn vísar til þeirrar hugmyndafræði að dýrastofnum sé stjórnað neðan frá, þ.e. að fæðan ákvarði velgengni stofnanna (bottom-up).

Þetta er andstaðan við ofan frá-niður, að dýrastofnum sé stjórnað með því að þeir séu veiddir eða étnir, (top-down).

Í kvöld var á Rúvinu viðtal við Arnþór Garðarsson prófessor í dýrafræði um ástæður fækkuna sjófugla og kríu hér við land, stofna sem háðir eru sandsíli eða loðnu sér og unga sinna til viðurværis. Arnþór var eindregið þeirrar skoðunar að stofnar sjófugla stjórnuðust af fæðu og að "eitthvað hefði komið fyrir hana" en rannsóknir á grunnsævi, sem skýrt gætu brotthvarf átu sandsíla, skorti algjörlega, rannsóknaskipin flytu ekki svona grunnt.

Ekki nefndi hann einu orði að brotthvarf sandsíla gæti verið vegna þess að þau hafi verið étin af þorski. ýsu eða öðrum ránfiskum. Það má alls ekki nefna þennan möguleika!

Það þarf ekki að vera þannig að fiskar hafi ofétið sandsílin, en því má ekki ræða þennan möguleika?

Merkilegt er að fræðimenn telja að eina rándýrið sem hafi áhrif á dýrastofna sé maðurinn, en yfirleitt eru allar breytingar á fiskstofnum raktar til ofveiði manna og einu stjórnunaraðgerðirnar beinast að því að draga úr veiðum!

Flateyingar sögðu að sandsílið hefði horfið þegar risaganga af þorski gekk inn í fjörðinn

Margt fleira bendir til þess að fiskur éti upp bæði sandsíli og loðnu. Hvers vegna þessi feluleikur? Því má ekki ræða þetta.

Ég hef áður skrifað um þetta,  en það virðist alls ekki mögulegt að fá að ræða þessi mál. 
Útvarpið sá ekki ástæðu til tala við fleiri sérfræðinga hvað þá að að velta upp fleiri hugmyndum um rýrnun sjófuglastofnanna. Þvílík "fréttamennska", ekki má ræða neitt sem gæti sett spurningamerki við fiskveiðistefnu Hafró, sem er að vernda fisk til að geta (kannski) veitt meira seinna.

Íslenska þjóðin hefur mátt súpa seyðið af þerri stefnu í aldarfjórðung og er þar ekkert lát á. 

Athugasemdir

[Jóhannes Laxdal Baldvinsson, 2.12.2011 kl. 23:28]

Jón, kenningar Hafró eru orðnar að mýtu fyrir hagfræðinga og pólitíkusa. Og eins og með aðra mýtu þá breiðist vitleysan út hraðar en gagnrýnin, því það er svo einfalt að trúa bara og treysta og þurfa ekkert að hugsa

[Þórir Kjartansson, 3.12.2011 kl. 17:24]

Takk fyrir þennan pistil Jón. 

 ,,Merkilegt er að fræðimenn telja að eina rándýrið sem hafi áhrif á dýrastofna sé maðurinn, en yfirleitt eru allar breytingar á fiskstofnum raktar til ofveiði manna og einu stjórnunaraðgerðirnar beinast að því að draga úr veiðum!"        Þessi málsgrein segir ótrúlega mikið um þá blindu sem ríkir meðal þeirra sérfræðinga sem um þetta fjalla. Og þetta á ekki bara við um fiskinn í sjónum.   Sama vitleysan ríkir um t.d. rjúpuna. Þó allir sem fylgjast vel með hinni villtu náttúru landsins viti það ósköp vel að refurinn étur margfalt það sem skotið er af rjúpu segja flestir þeirra sérfræðinga  sem spurðir eru álits að hann hafi ekki mikil áhrif á stofnstærð rjúpunnar eða annarra mófugla.  Og lausnin þar er sú sama og með fiskinn; VEIÐA MINNA!!                                                  

[Jón Kristjánsson, 3.12.2011 kl. 19:42]

Takk fyrir Þórir

Það er náttúruleg eitthvað mikið bogið við vísindi, sem eiga að hafa "það sem sannara reynist".

Langt er í frá að slíkt sé tilfellið. Einungis þetta, að megi ekki rannsaka eða ræða allar hliðar mála ætti að kalla á inngrip stjórnvalda eða ráðamanna. Það gerist ekki, því þau eru með í sukkinu, - og fólkið situr uppi með delluna.

Hugsaðu þér, Hafró hótar að það þurfi að lækka kvóta vegna þess að rannsóknaskipin séu bundin vegna verkfalls!

Þegar aflinn var mestur fyrir 1970, voru engin rannsóknarskip á sjó til að skammta okkur gæðin. Við bara sóttum sjóinn og uppskárum það sem hann gaf.

Nú hótar Hafróliðið okkur með samdrætti, vegna þess að þeir komast ekki á sjó svo starfsliðið fær ekki sjópeninga???  Þegar menn vita ekkert, skal náttúran njóta vafans. Mesta della sem fundin hefur verð upp, all í þágu "vísinda". 

[Sólrún (IP-tala skráð) 8.12.2011 kl. 20:56]

Hvernig er með fugla og sandsíli til dæmis við Færeyjar og Hjaltland ?