Umpólun Össurar í fiskveiðimálum

Össur ráðherra skrifaði grein í Fréttablaðið í dag og í eftirfarandi hluta greinarinnar fjallar hann um sjávarútveg:

"Innistæða uppsveiflu"

"Ríkisstjórnin stóðst þá freistingu sem kom fram í frýjunarorðum stjórnarandstöðunnar um að taka meira út úr innistæðu okkar í fiskistofnum í hafinu. Árangurinn er sá að næstum allar tegundir eru nú á uppleið. Varanleg aukning í þorskkvóta svo nemur þúsundum tonna mun koma fram á næsta fiskveiðiári, og fyrirsjáanlegt að aukningin mun halda áfram á næstu árum. Þegar er búið að slá undir 10 þúsund tonna kvóta í karfa og auka strandveiðar. Viðbót sem nemur heilli loðnuvertíð virðist í sjónmáli."

Hann virðist heldur betur hafa snúið við blaðinu frá árinu 2005 en þá sagði hann í þingræðu:

"Það eru ekki mörg ár síðan, ætli það sé ekki áratugur, að ég hélt hér miklar ræður um gagnsemi þessarar aðferðar við að vernda þorskinn í hafinu. Ég taldi þá að þessi vísindi væru miklu nákvæmari en reynslan hefur svo sýnt. Við höfum hins vegar horft upp á það á síðustu árum að stöðugt eru að koma fram nýjar upplýsingar sem benda til þess að þær aðferðir sem við höfum notað séu ekki nægilega traustar. Við höfum horft framan í ár þar sem tapast hefur nánast helmingurinn af áætluðum stofni í hafinu. Við höfum séð fram á það að upplýsingar sem hafa komið fram úr t.d. veiðiröllum hafa ekki reynst réttar. Ég minnist þess sérstaklega þegar ég skrifaði á árum fyrr grein í Morgunblaðið og benti á að ósamræmi væri milli þess sem Hafrannsóknastofnun gaf út í lok þess árs sem æskilegt aflamark og þeirrar niðurstöðu sem kom fram í rallinu. Ég fékk aldrei skýringar á þessu misræmi, mér var einungis sagt að ákveðin aðlögun hefði átt sér stað."

Og áfram hélt hann:

"Þetta er ekki traustvekjandi og það er heldur ekki traustvekjandi þegar Hafrannsóknastofnunin slær um sig þéttan varnarmúr og hleypir ekki að þeim aðilum sem gagnrýna kerfið. Ef menn geta fundið eitthvað að þeim aðferðum sem Hafró beitir á það að koma fram. Það hlýtur að vera í þágu vísindanna og þágu greinarinnar að einmitt gagnrýnendunum sé lyft. Við höfum hins vegar séð það aftur og aftur að þeim er kerfisbundið bægt frá."

"Ég er þeirrar skoðunar að innan Hafrannsóknastofnunarinnar ríki kreddur. Alls staðar skapast kreddubundið andrúmsloft þar sem frjálsir vindar rökræðu og gagnrýni fá ekki að leika um. Ég er þeirrar skoðunar að með einhverjum hætti verði að skapa umhverfi þar sem samkeppni hugmynda á þessu sviði ríkir. Ég er þeirrar skoðunar að það væri ákaflega farsælt í fyrsta lagi að brjóta upp þetta kerfi sem við höfum í dag, þ.e. að á sömu hendi í sama ráðuneyti séu bæði eftirlit og rannsóknir með auðlindinni og hins vegar ákvörðunartaka um hversu mikið megi taka af henni. Þetta eru andstæðir hagsmunir sem vegast á og það er ekki farsælt."

Hann sagði líka:

"Ég er þeirrar skoðunar að það sé orðið mjög óheillavænlegt hvað þessi umræða er lokuð innan veggja Hafró. Við ræddum það fyrr í dag í þessari umræðu hvernig maður hefur stundum á tilfinningunni að öðrum og gagnrýnni skoðunum sé skipulega haldið frá. Annað birtingarform á þessari skoðanaeinokun Hafrannsóknastofnunar birtist í því að við þingmenn getum ekkert lengur hringt í fiskifræðinga og fengið upplýsingar. Við fáum bara upplýsingar sem við þurfum á að halda í gegnum forstjóra stofnunarinnar. Þannig er verið að straumlínulaga skoðanir Hafró og koma þeim á framfæri bara í gegnum einn munn, einn farveg, og fyrir vikið verður þetta ákaflega einsleitt. Ég er þeirrar skoðunar að það þurfi hömluleysi hinnar frjálsu hugsunar sem ríkir við háskóla og þar sem samkeppni hugmyndanna er við lýði til þess að brjótast út úr þessum farvegi. Eitt örstutt dæmi: Hv. þingmaður Jóhann Ársælsson nefndi hér 25% aflaregluna. Enginn maður á Íslandi getur sýnt fram á hvernig hún var fundin. Ég hef farið í gegnum það. Ég barðist í gegnum það og skildi ekki. Ég fór og spurði sérfræðingana og þeir sýndu mér útreikninga sem leiddu að annarri niðurstöðu."

Nú virðist hann vera búinn að gleyma öllu. Össur skildi ekki aflaregluna þá, nú þegar hún er komin niður í 20% segir hann ekkert, kannski er hann farinn að skilja hana núna.

Ég sendi honum póst í ársbyrjun 2009 og minnti hann á þessi ummæli. Hann svaraði að bragði:

"Ef ég verð í vinstri stjórn e. kosningar þá muntu sjá vöðva urriðakallsins hnyklast - ég er komið með fullkomið ógeð á kvótakerfinu. Það verður partur af stjórnarmyndunarviðræðum - ef ég kemst nógu ofarlega aftur til að verða í þeim. -Taktu eftir fylgi VG - það liggur allt á móti kvótakerfinu svo Grímur ætti að dansa með".

Ekki veit ég hver bauð hverjum upp í dans, en víst er að hann var aldrei stiginn. Hver skyldi hafa stöðvað ballið, forritað Össur og umpólað honum?
 

Athugasemdir

[Árni Gunnarsson, 30.8.2011 kl. 21:53]

Það er flokkað undir meiðyrðalöggjöf að nefna nöfn þegar minnst er á fífl.

Ég ætla að vera varkár en voðalega er það erfitt.

[Sólrún (IP-tala skráð) 31.8.2011 kl. 20:19]

Það er margt sem eg fávís manneskja skilur  ekki í ráðslagi  fiskveiðistjórnunar

Mér hefur fundist það áberandi og algerlega furðulegt í sumar að hlusta dag upp á dag  rumu tilkynninga um skyndilokanir  á miðum kringum landið.

Þessar skyndilokanir voru nánast undantekningalaust á HANDFÆRABÁTA...

En á sama tíma máttu snurvoðar dallarnir vaða þarna yfir með tilheyrandi smáfiskadrápi sem að eins og margir vita er ekkert smátt í sniðum

Ekki veit eg í hvaða útlandi Keisari  Félags smábátaeigenda hefur verið að spóka sig þá.

En svo mikið er víst að ekki heyrðist eitt múkk úr þeim herbúðum mér vitanlega

[Jón Kristjánsson, 31.8.2011 kl. 20:35]

Sólrún

Það er rétt að þessi skyndilokana upptalning , sem hefur varað í 20 ár er ótrúleg. En eins og með veðurfregnirnar er fólk orðið vant þessu og gerir sér ekki neina rellu út af því nema þú og ég og nokkrir vinir mínir.

Það er rétt hjá þér, Keisarinn, þungaviktarmaðurinn, skiptir sér ekki af málinu enda orðinn kvótasinni, hefur hallað sér á sveif þeirra manna í félaginu sem hafa keypt sér kvóta og eru skuldum vafðir.

Ég skrifaði pistil um þessa skyndilokunar dellu, kíktu á hann. 

[Sólrún (IP-tala skráð) 31.8.2011 kl. 22:20]

Já það þyrfti að koma umræða um þessi mál.Það hefur verið meiri þöggun um Fiskistofu  og Hafró en Páfann  í Róm öll þessi ár og  virðist vers hafun yfir alla gagnrýni alveg sama hvað.

Enda beitt mikilli skoðanakugun strax í upphafi af hendin stjórnvalda

Ef farið væri ofan í saumana á þessu furðulega batteríi sem að öllum líkindum er að stórum hlura kostað af sægreifum þó það hafi yfir sér skikkju ríkisstofnunar. þá gæti komið ýmislegt í ljós

Það kom víst einu sinni fyrir í Páfagarði  að við nánari athugun reyndist Páfinn vera kona....

Nú er rétti tíminn til að þjóðin ræði kvótamálin þegar verið er að gera breytingar þar.

Eg er alveg sammála því sem segir  þeim í auglýsingum útgerðarmanna sem nú eru í gangi þessa dagana ,að íslendingar mega ekki við mistökum í kvótamálu.það er að segja meiri mistökum.

Það er með ólíkindum að Skinney Þinganes skuli minna á sig í þessu samhengi  sem dæmi um hagkvæmni í sjávarútvegi...

[Haraldur Baldursson, 4.9.2011 kl. 16:42]

Morfís keppnin eilífa við Austurvöll færist sífellt fjær lausnum. Sorglegt að kosnir fulltrúar sjái ekki hvert þeirra hlutverk er. Lausnirnar eru svo margar.

Tilraunir til að venda skútunni að farvegi sem skilar okkur (á methraða) aftur til sæmilegrar velferðar eru svæfðar.

[Níels A. Ársælsson., 5.9.2011 kl. 08:14]

Tekur nokkur mark á orðræðu þessa vindhana ?