Loðnuskandallinn

Alveg er það merkilegt hvernig Hafró færa að halda loðnuflotanum í gíslingu meðan þeir rassskellast um Dumbshafið og reyna að telja loðnu. Þeir virðast trúa því sjálfir að unnt sé að telja loðnu af einhverju viti á Íslandsmiðum með nákvæmni upp á 1000 tonn.

Eftir margar ferðir út og suður hafa þeir nú mælt 355 þús tonn og vantar því enn 45 þús tonn upp á 400 þús. tonnin sem ákveðið var fyrir áratugum að skyldi vera nauðsynlegur til viðhalds tegundinni. Því skulu ekki hafnar veiðar að svo stöddu. Væntanlega verður beðið og beðið á meðan þeir reyna að mæla meira og meira, ef þeir finna 46 þús tonn í viðbót verður væntanlega dreginn hvítur fáni að húni og gefið út leyfi fyrir 1000 tonnum.

Segjum nú að hægt sé að mæla þá loðnu sem siglt er yfir með einhverri nákvæmni. Það sem snillingarnir hafa fundið á sínum ferðum eru nú orðin 355 þús. tonn. Að öllum líkindum hafa þeir siglt fram hjá eða ekki fundið nokkrar loðnutorfur, svo óvissan er í þá áttina, lágmarksmæling. Það er því alveg öruggt að það er meiri loðna en þeir finna. En – það verður að bíða þar til snillingarnir hafa fundið það sem þeir hafa ekki fundið nú þegar. Þá, þegar þeir hafa legið á því og talið má fara af stað. Við þetta gauf og þennan fíflagang tapast tími, enda hefur það gerst í a.m.k. sl. 3 ár að komið hefur loðna sem hefur ekki „fundist áður“  skýtur allt í einu upp kollinum, en of seint svo skipin ná ekki kvótanum. Í fyrra lágu þeir á torfu í heila viku og mældu og mældu, allir biðu, en þegar kallið kom var það of seint, kvótinn féll dauður niður.

Hvernig stendur á að mönnunum líðst það ár eftir ár að hafa milljarða af þjóðinni? Væri ekki nær að gefa út byrjunarkvóta strax til að koma flotanum í gang, og þannig finna meira af loðnu fyrr?

Önnur hlið á þessu máli er svo sú að þó alltaf hafi verið skilin eftir þessi heilögu 400 þús. tonn til hrygningar,  er loðnustofninn í sögulegu lágmarki.

Vill ekki einhver stoppa þessa vitleysu? 

Hrygningarstofn loðnu 355 þúsund tonn

Athugasemdir

[Jóhannes Ragnarsson, 12.1.2010 kl. 20:41]

Það hefur sýnt sig mörg síðustu ár, að loðnustofninn hér við land hefur verið mjög lítill. Með tilliti til þess þá hafa loðnumælingar Hafró gefið þokkalega mynd af því sem hefur verið að gerast varðandi stofninn.

Og annað: Hvað hefur þú í höndunum sem bendir til þess að loðnustofninn sé stærri, jafnvel margfalt stærri,en rannsóknir Hafró benda til? Ég hef grun um að þú hafir akkúrat ekkert slíkt í höndunum. Sért með öðrum orðum: að bulla.

Miðað við sannarlegt ástand loðnustofnsins síðustu 10 ár eða svo, væri farslælast fyrir þjóðina að banna allar loðnuveiðar um ótiltekinn tíma. 

[Atli Hermannsson., 12.1.2010 kl. 21:50]

Ég var alltaf skeptískur á skefjalausan loðnumokstur líkt og þann sem stundaður var um langt árabil - og þá alveg sérstaklega í bræðslu. En það þarf enginn að segja mér að 100 þúsund tonn eða svo sem reynt væri að gera sem allra mest úr hefði afgerandi áhrif á afkomu stofnsins eða gerði útslagið varðandi hina "meintu" uppbyggingu þorskstofnsins. Því á ráðherrann strax að ropa upp úr sér byrjunarkvóta upp á 100 þúsund tonn. Einu skilyrðin eru þau að hámarka verður aflaverðmætið og þá eru flottroll bönnuð.    

[Jón Kristjánsson, 12.1.2010 kl. 21:59]

Loðnustofninn lítill? Etv. ætti að skilja eftir meiri loðnu til hrygningar? Það sem ég er að meina að þessi 400 þús hrygningarstofn er út í loftið. Það eru ekki veiðar mannsins sem stjórna stærð loðnustofnsins.

Hvers vegna er farsælt að banna loðnuveiðar, sérstaklega ef hún er ekki til? 

[L.i.ú., 12.1.2010 kl. 23:45]

Þetta er kostulegt. Ef þeir finna bara 360 þúsund tonn og þar af 5 þúsund tonn ókynþroska þá er ekki hægt að slá því föstu að meira sé í sjónum. Eða eins og einn snillingurinn sagði í haust í Fiskifréttum "við getum ekki borði ábyrgðina á því ef illa fer" með því að leyfa loðnuveiðar, ef þeir eru ekki alveg vissir um að 400 þúsundin fái að hrygna.

Hvort sem menn telji að það eigi að friða loðnuna til að byggja upp þorskinn eða ekki skiptir engu. Úr því að það eru stundaðar loðnuveiðar þá á að sjálfsögðu að senda loðnuskipin út á veiðar og láta þá sem þekkinguna hafa um að finna loðnuna.

En það er merkilegt að í þeim stofnum þar sem farið hefur verið að tillögum Hafró þar er ástandið langverst. Það er kannski ekki við því að búast að fá upp stóran loðnustofn á meðan þorskurinn er offriðaður og fær að svamla um allt fyrir norðan land og graðga í sig ókynþroska loðnu á milli þess sem hann gæðir sér á rækjunni.

[Jóhann Elíasson, 13.1.2010 kl. 09:26]

Ég er á því að vegna mikillar þorskgegndar við landið og mjög svo stækkandi hvalastofns, hvalir af öllum stærðum og gerðum, þá er samkeppnin um ætið að aukast í hafinu og eins og allir vita þá er loðnan vinsæll matfiskur og þar af leiðandi er MJÖG lítið eftir af henni.  Þetta er frekar einfalt.

[ragnar bergsson, 15.1.2010 kl. 19:45]

Ég hef ávallt haft áhyggjur af miklum loðnuveiðum án tillits til stærð þorskstofnsins.