Draumalandið?

Er það tilviljun að stóriðjuflokkarnir sem nú vilja leysa vanda þjóðarinnar með aukinni stóriðju leggja báðir til að stórauka framlög til hafrannsókna, Hafró? 
Ég hef lengi furðað mig á því hvers vegna Hafró og móðurstofnanir, ICES í Evrópu, NAFO og NOOA í Ameríku og fleiri s.k. "vísindastofnanir" leggja stöðugt til niðurskurð á aflaheimildum. Fyrst var komið á kvótakerfi með aflakvótum og eftir það var auðvelt að minnka veiðiheimildir með því að ráðleggja niðurskurð. Þetta var gert í nafni stofnuppbyggingar, auðvelt var að telja fólki trú um að með því að taka minna núna mætti taka meira seinna. Þetta seinna hefur hins vegar ekki orðið. Hin háu markmið breyttust fljótlega í að drepa niður fiskveiðarnar. En hvers vegna? 
Ég hef fengist við fiskirannsóknir og veiðráðleggingu í 35 ár, og ég veit að þessar ráðleggingar eru rangar. Það er marg sannað að ef vöxtur er minnkandi gerir illt verra að draga úr veiðum, það þarf að auka þær. Minnumst þess að fyrir daga stjórnunar, en 1976 gátu þjóðirnar farið að stjórna veiðum eftir að landhelgin varð 200 sjómílur, voru engin fiskveiðivandamál: Ekkert stofnhrun, engin ofveiði eða rányrkja, sem við þekkjum svo vel í dag og orðið "vistvænn" var ekki til í málinu. Menn einfaldlega veiddu meðan eitthvað var að hafa, fóru þá annað og komu aftur þegar veiðin tók sig upp aftur. En þó þessa vísindastofnanir viti að stefna þeirra sé röng, reynslan hefur sýnt það, þá breyta þeir ekki um aðferðir, sem td. gætu falist í að veiða meira og beina sókn meira í smáfisk. Alls ekki, áfram með niðurskurðinn. Helst er að fyrir kosningar, að þeir bæti aðeins í af pólitískum ástæðum svo allt líti betur út. Davíð fann 30 þús. tonn á sínum tíma og EKG 30 þús. til viðbótar í fyrra.
Eftir að ég sá Draumalandið og viðtalið við Sigurð Gísla Pálmason rann ástæðan allt í einu upp fyrir mér:
Veiðisamdráttur er til þess gerður að plægja jarðveginn fyrir stóriðju auðhringanna. Kárahnjúkar handa aflalausum Austfirðingum, Vestfirðinga sviftir fiskinum fyrir olíuraffínerí, Suðurnesjamenn, sem fast sóttu sjóinn, þeir biðja um álver, gagnaver, virkjanir og allt það. Húsvíkingar, þeir heimta álver, fisklausir.
Tími er kominn til að svifta sérfræðingana völdum og fara að nýta fiskimiðin í þágu þjóðarinnar - aftur. 

Athugasemdir

[Atli Hermannsson., 10.5.2009 kl. 21:48]

það er mikið til í þessu að niðurskurðurinn kalli á stóriðju -  hvort sem það sé meðvitað nema hjá örfáum þá er þetta alla vega þróunin.

En ég hef verið að talað við nokkra bátaskipstjóra að undanförnu. Þeim ber öllum saman um að fiskgengd hafi verið með allra mesta móti í vetur. Bubbi á Aðalbjörginni sagðist t.d. ekki muna annað eins fiskirí frá því hann byrjaði  árið 1964. Ég get sagt sem dæmi: að þegar ég var að byrja að selja þorskanet upp úr 1980 var talið sleppa til að fá 500 kg í net áður en skorið var af. Þá var að meðaltali reiknað með að fá eitt tonn í 9-10 tommuna á árabilinu frá 1994 til 2000. En á laugardaginn var að tala við einn í Þorlákshöfn sem fékk 105 tonn í 40 net í vetur. Þar af voru tvær trossurnar frá því í fyrra. Þetta gera 2,6 tonn í net. Þetta er langt frá því að vera einsdæmi. Þá hef ég heyrt svipaðar sögur af netaralli Hafró sem lauk fyrir stuttu -  en að sjálfsögðu verður ekkert gert með það frekar en fyrri daginn....... Til hvers er netarallið annars ef það vegur ekkert í stofnmatinu?

[Haraldur Bjarnason, 12.5.2009 kl. 09:51]

Í gær var lokadagur vetrarvertíðar samkvæmt gamalli hefð. Í eina tíð tóku menn einfaldlega upp þorskanetin þennan dag, það var öll friðunin. Ég man það að á Akranesi kom fyrir að tekið var upp í mokfiskiríi. Þessa áráttu að hægt sé að geyma fisk sem smækkar vegna vannæringar er löngu búið að afsanna. Þá þarf einmitt að veiða meira til að minnka það sem fiskurinn étur undan sér og grisja stofninn. Við þekkjum þetta vel úr silungsveiðivötnum sem voru nytjuð mikið á fyrri öldum. Þegar ásókn í þau minnkaði hrundi veiðin og til urðu full vötn af smásilungi með fáum stórum ránfiskum inn á milli. Eitt þessara vatna er Þríhyrningsvatn skammt frá Möðrudal á Fjöllum. Þangað fór ég ásamt fleirum með fyrirdráttarnót fyrir 25 árum síðan. Árangurinn varð eitthvað um 200 smátittir með stóran haus og um 10 7-10 punda bleikjur, sem voru fullar af smásilungi þegar þær voru opnaðar. Svipað hefur verið að gerast hér við strendur landsins á síðustu árum.

[Halldór Jónsson, 14.5.2009 kl. 21:14]

Greindur kommi Jón fiskur !

[Árni Gunnarsson, 15.5.2009 kl. 11:05]

Er hann Jón fiskifræðingur nú orðinn kommi Halldór minn? Það held ég nú að sé málum blandað. Ég hef ekki lengi komið auga á komma hér nema þá helst nokkra hægri pólitíkusa sem heimta að hér verði rekinn áætlunarbúskapur í anda Ráðstjórnar og með því að ríkið kæmi upp stóriðju handa fólki svo það fari ekki að fikta við að hugsa sjálfstætt. Hægri kommar á Íslandi vilja ekki að fólk hugsi alltof mikið. Enda hrundi fylgi Sjálfstæðisflokksins þegar kjósendur byrjuðu að hugsa.