Höfðingsskapur Færeyinga

Gott boð, en höfum við hingað til komið þannig fram við Færeyinga að við eigum þeirra höfðingsskap skilið?

Á hverju ári semja þjóðirnar um gagnkvæmar fiskveiðiheimildir og eru Íslendingar grimmir í þeim samningum þó ekki stæði alltaf vel hjá frændum vorum. Hér hafa útgerðarmenn séð ofsjónum yfir þeirra heimildum.

Þá hefur það oft vakið furðu mína þegar við höfum verið að brenna inni með loðnukvótann vegna veðurs og tímaskorts, að ekki skuli hafa verið kallað í Færeyinga til þess að hjálpa okkur að ná kvótanum. Nei, heldur skyldi missa af gullinu en fara að biðja þá um aðstoð. Erum við menn til að þiggja af þeim rentulaust lán?

 

Færeyingar hafa þurft að berjast við aðra grýlu, Alþjóða hafrannsóknaráðið, ICES, sem stöðugt hefur verið að leggja til skerðingu í fiskveiðum. Þess ber að geta að í ICES mætast færeyskir og íslenskir ríkisreknir fiskifræðingar, sem láta líta svo út þegar þeir koma heim frá Kaupmannahöfn að ICES sé eitthvert "annað" batterí, sem þeir þurfi að glíma við.

Árið 2001 fengu Færeyingar tilskipun frá ráðinu um þriðjungs niðurskurð í veiðum, sem hefði þýtt mikið hallæri. Árið eftir fengu þeir svipuð fyrirmæli, en í hvorugt skiptið var þeim hlýtt og afli náði hæstu hæðum þvert á spár. Ég kom að þessu máli þá og tókst að sannfæra stjórnvöld um að ráðgjöfin væri röng. Það voru færeyskir og íslenskir fiskifræðingar, ríkisreknir, sem komu að þessari ráðgjöf. Þessir sömu menn réðust síðar að mér þegar þorskur fór í fyrirsjáanlega hefðbundna niðursveiflu, og kenndu mér um að hafa látið veiða of mikið. Sannleikurinn var hins vegar sá að þorskstofninn féll úr hungri en hungursástand skapast aldrei af ofveiði á þeim stofni sem er að horfalla.

Áfram hafa fræðingarnir róið og fyrirskipað samdrátt á hverju ári og helsta barátta stjórnvalda og sjómanna í Færeyjum er "bardaginn um fiskidagana". Með tímanum guggna sumir, líkt og hér þar sem menn hafa hreinlega gefist upp gegn "fræðingunum", óvinum fiskveiðanna, enda landið komið í þrot.

Nú vilja Færeyingar rétta okkur hjálparhönd, okkur sem reynum að skera niður veiðiheimildir þeirra hér, og leggjum til "fræðinga" sem einnig vilja láta þá skera niður afla heima fyrir. Förum við ekki að losna við þá menn? 

Býður Færeyingum ókeypis nám

Athugasemdir

[Haraldur Bjarnason, 29.10.2008 kl. 17:38]

Góður pistill Jón. Auðvitað hafa eiginhagsmunpotararnir hér með Hafró og LÍÚ í fararbroddi nöldrað yfir hverjum titt sem Færeyingar fá að veiða. Nú er lag að auka kvóta og bjóða Færeyingum aukinn hlut. Síldin fer vaxandi og vonandi kemur þokkalegur loðnukvóti. Þetta mundu Færeyingar þiggja með þökkum. Svo er nú Hafró bjartsýn á þorskinn núna, merkilegt að það skuli koma núna, auðvitað skipun að ofan.

[Atli Hermannsson., 1.11.2008 kl. 15:10]

Sæll Jón, auðvitað eigum við aðstoðina skilið. Til dæmis þegar Færeyingar lentu í sinni bankakreppu á 10 áratugnum þá hringdu íslensk stjórnvöld svo oft og djöfluðust svo í Færeyingum að það þurfti að leggja sverari sæstreng.

En án gríns þá var ég að skrifa í Moggann í dag um ESB, LÍÚ, Hafró og ICES í einum graut. Ég veit ekki hvort almenningur skilur það sem eg er að reyna að segja... en pointið er að það þýðir ekki fyrir LÍÚ að vera að setja útá nýtingastefnu ESB sem óyfirstíganlegan þröskul fyrir inngöngu í ESB, þegar nákvæmlega sömu trúarbrögð eru stunduð hér í boði ICES og í gegnum Hafró. Það kann að hljóma að ég sé að taka undir ICES bullið - en ég er bara að benda mönnum á að vera sjálfum sér samkvæmir. En að sjálfsögðu að henda ICES guðspjöllunum á bálið 

Svo er það svolítið fyndið að LÍÚ er nú að fara fram á 30 þúsund tonna aukningu á þorski vegna efnahagsástandsins.... en ekki vegna þess að stofninn leyfir það... eða að það sé stutt vísindarannsóknum -  hversu vitlausar sem þær kunna svo að vera, en það er annað mál....Hundalókík